Halligleven un de schietige Pingstbüx

Wi harrn uns as Musikanten-Duo denn Naam „Frische Bries“ toleggt. - De schull sik beten afsetten vun bekannte Muskantengruppen as „Speelwark“, „Godewind“ „Timmerhorst“ un anner Kapellen. Uns egen Kompositschoon „Halligleven“ schull dat harte Leven op Halligen in de Noordsee wedderspegeln. För de Plaan vun de „NDR-Wunnerschööne Noorden-Senn“ kööm uns Leed wull goot topaß un wi as Duo „Frische Bries“ as Bidraag för düsse beleefte TV-Senn inlaad.

Mit de Fähre „Hilligenley“ un gesamte Kledaasch wüürn wi op de Hallig Langeneß översett, un dor bi ’t Ankommen beindruckt sehn kunnen, woanns vun Hoochwater veel Drievgoot in de Wischentüün hängen bleven weer un de Waterstand opletzt nich toveel Schann un Sorgen achterlaten harr.

Hooch op de „Honkenwarf“ neven dat Hallighuus weer een sogenannte „Fehting“, (Söötwaterspieker) anleggt, de as ’n lüttje Braak rundherüm abschüssig mit Gras bewussen weer. Op Anwies vun de Kameralüüd schullen wi dor nu langtüffeln un egaalweg in ’t roote Kamera-Oog plieren un bloots uns „Gode-Luun-Grienscher“ nich vergeten. - Dat wi to ’n Vullplayback agieren un spelen schullen, wat later de Tokiekers in de Feernseh-Senn nich mitkriegen schullen, güng in de ganze Opreeg totaal ünner. „Du musst Dien Lippen so bewegen, dat de Lüüd denkt, Du singst live“, nickköpp de Kameramann. -„Ji sünd doch Profis un vergeet dat smuustern nich!“ -

Vun deftige Regenschuur vörher weer dat Gras üm denn „Fehting“ noch jümmers glatt un rutschig, wat mien Duopartner an sien Quetschkommod un ok ick so nich bedacht harrn. Ick schull as Sänger op Regie-Anwies jümmers twee Meter vörweg lopen un mi bi an de twintig Proven op dat roote Kamera-Licht konzentreern un egaalweg dorbi grienen.

Loop maal ümto so ’n pitschnatten „Fehting“ un do so, as würrst du live singen!

Muttst ok dien Leedtext in Kopp behollen un hest so ’n Ahn, glieks fallst du as ’n Taps op’ n Noors. - Een Luutspreker schull dat Vullplayback vun uns „Halligleven“ överdregen, wat avers jichtenswo kuum in deftigen Seewind to verstahn weer. De ganze Zirkus um dat 3-Minuten-Leed duur goot u geern so an de twee Stunnen.

Ik harr ’n sneewitte Kapteinsbüx un een blau’n Seemannssweeter an. Op ’n Kopp dröög ik so ’n „Elvsegler“ a. la. „Helmut Schmidt“. Un so passeer bi ’t X-temaal vör de Kameras rümstolzeer’n un dat nipp un nau in ’t roote Kamera-Oog plieren dat Malöör, wat ick geern verhinnert harr. - Ick rutscht op de natte Graskant ut un leeg bi denn „Fehting“ piel op ’n Noors! - „Mann, du Döösbaddel“, dach ik mit hoochrode Kopp, „So ’n Schiet avers ok un utrekent bi denn Feernsehndreih! - Mien strahlend witte Büx weer achtern totaal gröön insmeert. - De ganze NDR-Crew un ok mien Mitspeler hebben sik kringelt vör Lachen un kunnen sik gor nich wedder inkriegen.

Mien Malöör is jedenfalls in de Senn „Wunnerschöner Noorden“ ruutsneden wurrn un man kreeg dat later in Glotzkassen ok nich to sehn. - Harr villicht wull ganz goot för de Senn „Vörsicht Kamera“ döcht!………

Addi Kahl
24.01.2022