Dormit Wind weiht

Bi us in de Gegend stahn allerhand ünnerscheedliche Windrööd. Düt Johr harrn wi Besöök ut en süüddüütsche Grootstadt. Dor givt dat keen Windrööd. De Gäst hebbt grote Oogen maakt wo veel dat bi us sünd un dat de  Gröttsten höger sünd as bi se tohuus de Karktoorn (Kirchturm). En Dag weer düchtig Wind un de Rööd hebbt sik flott dreiht. Ik heff de Besöökers verklort, dat mit de Windrööd de Wind maakt ward, den se nu föhlt. De Lüüd vun de    Küst hebbt sik dat utdacht, dormit wi hier an de Küst betere Luft hebbt as in´n Binnenland. Se wullen mi dat nich so recht glöven. Annern Dag weer man bloots ne lichte Brise un de Windrööd stünnen still. Nu kann ik jo dat bewiesen, heff ik to usen Besöök seggt. Nu, wo de Windrööd afknipst sünd,     givt dat ok keen Wind mehr.

Jo, an de Küst dor kannst wat lehren.