de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6047742 Besucher seit Einrichtung am 15. Oktober 2007


 

De oostfreesk Akupunkturnadel

(Herkomen, Verbreden un Gebruuk)

 

Een van de öldst Therapieförms van de Medizin is de Akupunktur. Se kummt ut wied Oost, genau seggt, ut China. Dat is een egenaardig Weg, wu diese Therapie to uns funnen hett. Vör över 2000 Jahren levte in China een heel bedüden Mediziner, de heet Li Chung Aku (Li Chung heet: Dr. med.). Un disse Mediziner arbeid mit de Doktorske Li Chung Punk Tur tosomen. Se kemen sück nabi un hebbt denn ok bold heirad. De Dokorske Li Chung Punk Tur sall een heel moie Froo west ween. Doch wu dat so faken in`t Leven is, Moigheid is nich immer Vullkomenheid. De Moigheid van de Froo seten twee Egenskuppen fast, de de Keerl

a)      höchstmögelk Pläseer versekern un

b)      hüm to allerlei Utfinnen un Utspekuleren antörnen deen.

 

De Gene van de Moder van de Doktorske hebbt woll een Mutationsbrök lieden musst. Mögelk is dat, dat se indes se mit hör Dochter swanger gung, een Medaillon dragen hett. Un de Lüchttahlen ut Radium hebbt düchtig strahlt. Un daarvan is de moie Dochter, wat denn de latere Doktorske weer,

a)      nymphomanisch un

b)      masochistisch veranlagt

wurden.

 

Nu weet man ja, dat een masochistisch Veranlagung de unmögelksk Uptreden an de Dagen brocht. In dissen Fall begehr de Froo, to hör Lüst mit Nadeln stoken to worden. De gode Li Chung Aku muss nu fliedig pieksen. Een godig Fügung van dat Schicksal is`d ween, dat he een heel bestimmt Stell dropen hett, denn de nymphomanisch Veranlagung van sien Froo weer tomaal weg. Wat later weer ok de masochistisch Drifft weg na de Steken an anner Steden.

 

Li Chung Aku reep luud „Heureka“, dat aver in chinesk, ik hebb een neei Therapie funnen! Full Dankgeföhl nöm he disse Therapie to Ehr van sien Froo Li Chung Punk Tur un för sück as de Utfinner van de Therapie „Akupunktur“.

 

Disse geniale Entdeckung schull nich bloot de wiede Oosten glückerk maken. Up seltsaam Wies, so as se funnen wurdt, funn se ok de Weg na Europa. De venezianisch Koopmann un Entdeckungsreisende Marco Polo weer to Besök tegen Enn van`d 13. Jahrhunnert in China. Daar kreeg he een Stee as Statthalter. Un daar kreeg he ok wat van de Akupunktur to hören, wiel he Fründskupp mit de Thesen üm de Li-Chung-Aku-Forschungs plegen dee. All dat Weten van de neei Therapie nehm he mit na Venedig. He probeer de Therapie gliek bi sien Froo ut, de so allerlei Pien harr. Sien Froo mugg aver de Kalveree mit de Piekseree nich. Se jaag hör Keerl mit Schandaal ut`d Huus, ut Venedig. He gung nu up een neei Entdeckungsreis.

 

Wi köönt mit Bewunnern bemarken, dat de Akupunktur nich bloot de lieden Minsken hulpen dee, ok för de Minsken to neei Entdeckungen hulpen hett. Dör de bleuhende Hannel, de de Stadtstaat Venedig mit de Länners ut Norden dreev, funn de neei Heilkunn stracks de Weg in de noordelk Streken van Europa. Dat wunnert uns nich, dat de neei Heilkunn tomaal Ingang bi een van de klooksten Stammen van uns Land funn, bi de Oostfresen. De Oostfresen weern al immer de neei Heelmethoden togedaan, besünners wenn se van de Schoolmedizin ofwieken. Hier wurdt bloot an de Diagnostik van de Knokenbrekers docht: Inklemmt Nerv!

                                                 De Nadel is  16 cm  lang

Woll seker mussen de Akupunkturgereedskupp an de Lievwark van de Oostfresen anpasst wurden, wiel hör Maten in Verhältnis to de Chinesen, un hier besünners wegen hör Dickfelligkeit, heel anner Maten van de Nadeln kriegen. De Nadel mit 16cm Längd ist bit vandag de gröttste Erfolg. Bi de Gebruuk van de oostfreesk Akupunkturnadel is gewetenhaftig Konzentration vannöten un ok een egen Technik. Dat sünd Saken, up de man absolut achten moot. De to dokternde Stee an`d Liev moot up jeden Fall steril hollen wurden. Daarto is de oostfreesk Akupunkturnadel een Buddel Antiseptikum „Freesk Wattenwater“ bitogeven.

 

Dat Antiseptikum is nich bloot bi de Akupunktur antowennen, sünnern sleit ok bi anner Indikationen an, so steiht dat in de Gebruuksanwiesen. Bi de Gebruuk van de oostfreesk Akupunkturnadel schall man mögelkst up de lokal Gebruuk verzichten (Ofstippen van de to behanneln Steden). Daarför kummt beter de orale Gebruuk to Geltung. Al  12  bit  14  cl sünd genoog, üm de optimal Pienverlichtern bi de Behanneln tofaat to kriegen.

 

To de direkt Gebruuk van de oostfreesk Akupunkturnadel wordt to de Vörbereiden van de Insteekstee anraden, de Insteekstee mit een Schlagbohrmaschien to kennteken (1,5 cm). De Nadel moot denn mit Hülp van een Vörschlaghamer indreven wurden. Bi riekelk oral Gebruuk van`d Antiseptikum kummt tomaal Beterung in Sicht. Lüttje Ohnmachtfallen köönt intreden.

 

To Risiken un Nevenwirkungen fraagt Se de Ollske oder de Verfater van disse Ofhannel.

 

P.S. Dat dat Behanneln mit de oostfreesk Akupunkturnadel ansleit, köönt Ji daaran sehn, dat de Schriever vör de Makeree van disse Arbeid mit disse Akupunkturnadel in`t Groothirn stoken wurden is.

 

Amadeus Hakendübel

Dr. humoris causa

Upsett: Gottfried Ladenthin

 

In`t Plattdütsch sett: Rudi Rabe

 

18.04.2008

 


© 2008 Gottfried Ladenthin Veröffentlicht: 05.12.2008 um 13:18:16 Uhr
Dieser Text wurde 7738 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)