Klassentreffen Oestringfelde

Hermann Wilbers un sien „Sekretärin“ Carla Klostermann geb. Döring harrn
to`n 6. Klassentreffen van de ehemalig Hauptschool Oestringfelde inladen. De
Inschool-Jahrgänge 1940, 1941 un 1942 wurden upropen, binannertokomen. Van all
tosomen 70 „Neei-Alphabeten“ sünd tüskenin 17 stürven un stückofwat teihn sünd
nich uptodrieven. So kunn Hermann Wilbers an letzten 2. Mai 2008 in de Wald-
schänke Schoost 22 intüsken wat öller wurden Schölerinnen un Schöler un fiev
Tegenparts begröten.

Leider kunnen nich all Ehemaligen komen, enige weern nich good up Stück un daar

geev`t ok`n paar, de sück eenfach nich hören laten hebbt. Hermann leet sück nich
nehmen, de Ehrengast Professor Dr. Arnold Schultze besünners to begröten. He is
de jüngst Söhn van de ehemalig Hauptlehrer Friedrich Schultze. De Ehrengast wehr
mit sien Arms of: „Laat de Professor man weg, nömt mi man ganz eenfach Arnold!“

Bevör dat mit de Fiereree wieder gahn kunn, weer eerstmaal Fototermin ansett. In de

Beergoorn mussen sück alle in Positur stellen un för de Reporters een blied Gesicht
maken. To`n Gedenken an de in letzt Tied stürven Mitschölers geev dat een Gedenk-
mimüt. In de letzt Jahren harrn veer Mitschölers hör Golden Hochtied fiert. Dree daar-
van weern togegen un kregen een` feinen Blömenstruuß överreicht. Hermann Wilbers
wünsch paar moie Stünnen un geev dat Woord över an Rudi Rabe.

Jedereen harr vör sück up`d  Disch de Zeitung „Schortens aktuell“ van de Heiber-Verlag
ut Heidmöhlen liggen. Up de eerst Sied weer dat Binannerkomen mit een fein Klassen-
foto van 1948 ankünnigt. Dat full natürelk tomaal in`t Oog. De Heiber-Verlag harr dat 
to rechter Tied fertigbrocht, dat Book mit de Titel „De Paster kummt“ druckfrisch utto-
levern. Rudi Rabe freu sück, sien ehemalig Schooljungs un –deerns dat Book to präsen-
teeren. Een Raunen gung dör de Ruum, as he de Naam van de Paster nööm, de in de Titelgeschicht de Hauptrull speelt. De Schoolgeschichten un ok de anner Vertellsel
stötten up Interesse. Jedereen kunn sück een Exemplar kopen, wat denn ok alle doon
hebbt.

Na Koffie un Koken gung de Vertelleree los. Arnold, de Ehrengast, stunn up. He harr
för jedereen een paar Billersieden mitbrocht. To jeder Bild kunn he Utführungen maken,
of dat ut de Schooltied, ut sien Familie oder sien Hobbies weer. Sien van hüm herut-
brochten Böker funnen groot Interesse. Siene Belevnisse in Grönland worden besünners upmarksaam upnomen. In sien jung Jahren kunn he good turnen, besünners an de Barren. Wenn sien Vader knapp an Tied weer, sprung he of un to in un geev de Klassen Turnünnericht. Veel van de ehemaalig Schölers kunnen sück noch daaran besinnen.

De Namiddag gung flink vörbi. To`n Enn geev dat wat Feins to eten. De Köken harr sück würrelk Möh maakt, de Gasten tofree to stellen. Dat wurdt al dunkel, as de Letzt na Huus
hen gung. All weern begeistert van de moie Dag. Mit „Wehmut“ üm`t Haart wordt Of-
scheed nomen, aver mit de Sekerheid, dat in twee Jahren wedder een Inladung kummt,
wenn dat denn heet: „Inladung to`n 7. Klassentreffen.“ Un dat schall woll in`t Jahr 2010 stattfinnen. Hopentlik sünd denn noch alle gesund un munter.

Rudi Rabe