de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6046784 Besucher seit Einrichtung am 15. Oktober 2007


Ballonfahrt

 

Mag woll twalv Maand her ween, ik harr enige Lü to`n Koffie inladen, daar fahr över uns weg een Ballon. Fein antosehn, so bunt un ruhig, kien Hektik. Een „Huhuuu“ tön van baven. Daschendöker wurden wunken. Wi repen torügg: „Huhuuu!“ De Ballon fahr in Richt Westen tegen de Sünn, wurdt lüttjeder, bit he denn nich mehr to sehn weer. De Bööm verdecken de wiedere Sicht. „Ach ja,“ segg ik mehr to mi, „daar mugg ik ok woll maal mitfahren.“ Een van mien Gasten hett dat mithört, aver daar bün ik later eerst achter komen.

 

Nu keem mien Geburtsdag in Sicht. Ik nög mien Verwandten un de Bekannten to`n Eten. Un wiel mien Wohnung veelst to lüttje för all de Lü is, wurdt mien Geburtsdag in een Lokaal fiert. Un daar mien Geburtsdag ok noch een besünners „Jubiläum“ weer, harrn all toseggt un all sünd ok komen. Ik hebb mi seggt: „Günn di ok maal wat, dissen Dag kannst du ok bloot eenmaal fiern in dien Leven.“ Jedereen harr een lüttje Geschenk mitbrocht. Hebb mi düchtig freit. Toletzt kreeg ik een Ümschlag överreicht, un wat weer daarin? Een Goodschien för ene Ballonfahrt! Hierbi weer mien Freid an gröttsten. Mien Wunsch kunn in nächst Tied in Erfüllung gahn!

 

De Weken vergungen un tomaal keem een Anroop van de „Ballonünnernehmer.“ Vanavend üm 18 Ühr! De Stee van de Offahrt kreeg ik ok noch seggt. Nee, dat gung nich, leider! Ik weer noch up Arbeid un fröher weg gahn dat gung nich. Ik muss ofseggen. „Na good,“ seggt mien Tegenöver, „Se kriegt wedder Bescheed, wenn`d Weer un de Wind günstig staht.“ Veerteihn Dag later weer`t sowied! Saterdag, 18 Ühr in Richtung  Sillenstee schull ik mi infinnen. Nu geev`t kien Torügg, ik muss nu toseggen, Noch eenmaal ofseggen bloot wiel ik nu Muffensusen harr, nee!  „Ik koom un bün rechttiedig daar.“

 

Ik bleev eerst noch ruhig. Man richtig Schlaap in`t Nacht hebb ik nich kregen. Immer wedder keem mi de Ballon in`d Kopp. Ballonfahren is doch wat anners as mit een Fleger in de Höcht gahn. Un wu is dat, wenn du schlecht wurdst? De köönt di doch nich van daar boven  rünnersmieten! Un gliek na`t Ofheben un denn wedder landen, dat geiht doch ok nich! Wat schölt de anner Lü denn denken, de hebbt doch ok alle veel Geld för de Reis betahlt! Un wat is, wenn tomaal düchtig Wind upkummt un de Ballon över`d Water ofdrifft? Mag nich an denken, swemmen is nich wied her bi mi!

 

Saterdagmorgen bi`d Fröhstück gung mi dat wedder good. Man bloot nich toveel mitnehmen!

Över de Dag nich alltoveel drinken. In de Körv gifft dat doch kien Klo! Lever een Dringbuddel üm de Buuk görden. Seker is seker, wenn ik Dörst kriegen schull. Un ja, de Fotoapparat nich vergeten! Un nich so licht Tüg antrecken, daar boven kann`t zugig worden. So utrüst bün ik denn up Tied ankomen. Mien Verwandten un de Bekannten kemen up mi daal: „Hals und Beinbruch!“ De kunnen good snacken, wenn se wussen, wu dat bi mi binnen utseeg. Denn mien „Ballonangst“ weer torüggkomen. Aver nix anmarken laten! Tapfer ween un so doon, as wenn dat de moiste Freid för mi is.

 

 

 Öven, öven, öven!

 

De Mannslü trucken de Ballonhüll över`t Gras un hollen se mit Tauen fast. Wi Ballonfahrer mussen nu dat Instiegen öven. Ik bün ja noch gelenkig un schwuppdiwupp land ik in de Körv. De Ballonpilot geev uns Instruktionen un mit all mien Neeisgier flog mien Angst weg, man eenfach so! Na, dat is ja good, denk ik.  Mit de Gasbrenner wurdt de Ballonhüll upblasen, se wurdt immer grötter un strammer. Doch as dat Kommando keem „Leinen los!“ kreeg ik mien Sweet. „Winken Sie ein letztes Mal, denn nach hier kommen wir nicht wieder zurück,“ see de Ballonpilot. Un de Lü daar ünnen un ok de Koih un de Peer, de Hüüs un de Bömen, alle wurden lüttjer, bit se denn nich mehr to sehen weern.

 

    

  Huhuuu!!!                                    Wiedersehen!!

 

Mit lichten Oostwind gung dat nu in Richtung West, de Sünn entegen. Herrlich Utblick rundümto. In Oost Wilhelmshaven mit de groot Scheep, up linker Sied de groote Windpark un up anner Sied dat wiede gröne Wangerland. Över de Flugplatz fahren wi. Man good, dat vandag kien Flugverkehr is. Un denn dat wiede Oostfreesland mit dat veel Veeh un de groote Burenplaatsen. De Kanalen un de Straten kunnen good sehen. Un de Autos eerst, so lüttje, as wenn`t Speeltüg weer. För mien Digitalkamera harr ik genoog Motive.

 

Na eenuneenhalv Stünnen gung de Fahrt so langsaam to Enn. De Hüll wurdt nich mehr so veel naheizt un so verloren wi an`t Höcht. De Pilot harr düchtig Erfahrung un keek sück een good Stück Land mit Stratenanbindung ut, wo he mit uns „Pack“ landen kunn. Över Funk weer he mit dat Begleitfahrtüg jedertied in Kontakt, un so wussen se ok, wo se hen mussen. Aver eerst muss he noch över een moorig Stück Land weg.Daar stund Water un daar schullen wi doch kien natt Fööt kriegen. Wenn wi doch eerst ünnen weern! Hopentlik geiht allens good. „Alle in die Hocke und festhalten!“ De Körv sett een Maal up un kipp bisied. Een Juchseree! Schaa, dat de moie Fahrt to Enn weer. De Sünn gung so langsam ünner. Wi bekeken uns dat Falten van de Hüll un denn dat Verstauen in de Wagen. Jedereen van uns kreeg een Urkund mit adligen Naam. Un denn gung dat mit Auto na Huus. Dat een kann ik verspreken: Nächst Maal krieg ik bestimmt kien Ballonangst mehr! Hebb mi doch freit, dat ik mien Bangbüxigheid överstahn hebb.

 

 

 Renaturierung van Moorfladen

 

Antchen Siuts

Gräfin zur flotten Niederkunft

von Großefehn

 

30.06.2008


© 2008 Antchen Siuts Veröffentlicht: 05.12.2008 um 13:18:16 Uhr
Dieser Text wurde 9679 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)