de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6047447 Besucher seit Einrichtung am 15. Oktober 2007


 

 

Pillendreiher

 

Mit so een lüttje Digitalkamera kann man ja so moi Billers maken. Se is nich mehr wegtodenken. Överall wordt se bruukt, natürelk ok in Urlaub. Koomt de Lü van hör Urlaubsreis torügg, denn worden de Billers an de Computers ankeken. Daar kreeg ik ok dat Bild van een Pillendreiher to sehen. De „Hillig Pillendreiher“, so nöömt man de Käfer, kummt hauptsächlich in de Mittelmeergegend vör. To hör Eioflaag dreiht se sück een rund Kugel ut Schiet un Mest, un disse Kugel vergravt se denn in de Eer. Un bi dat Ankieken van dat Bild denk ik so bi mi, dat dat ja ok bi uns Pillendreihers gifft. In fröher Jahren hebbt disse Pillendreihers de Kugeln ok sülvst maakt, nich ut Schiet, ne, ut Heelplanten un anner Bigaven. Un disse Kugeln köffen denn de krank Lü för veel Geld un hopen, dat se wedder up Benen kemen. Vandaag heet de Pillendreiher Aptheker. Se dreiht de Pillen nich mehr sülvst van Hand, se kriegt se van de Pharmaindustrie. Aver düür sünd se immer noch.

 

Dat dütsch Gesundheitssystem is krank. Ist dat nich komisch? Gesundheitssystem krank? Dat is aver so. Immer hört wi, dat de Kösten för uns Gesundheit van Jahr to Jahr stiegen doot. Wu kann`t angahn? Sünd de Lü mehr krank, verdeent de Doktors to veel Geld, sackt de Pharmaindustrie toveel in oder sünd de Aptheker Halsofschnieder? Dat kannst`d ja nich mehr hören. Un nu willt de Lü in Berlin tokomen Jahr de Gesundheitsfonds inrichten. All Versekerten betahlt denn de glieker Bidrag in de Krankenkass. Of dat helpen deit, dat Minus to beseitigen? Ik weet nich recht.

 

Wu weer dat in fröher Jahren? In uns Stadt, wat fröher noch Gemeen weer, geev dat twee Doktors, een Kusendoktor un een Apthek. Un vandaag? Veermaal so veel Doktors, dreemaal so veel Kusendoktors, sessmaal so veel Apthekers. Daarto koomt noch de Heilpraktikers un Lievkneters. Fröher mussen sück de Lü sülvst helpen. In mien Kinnertied weer ik veel bi mien Grootöllern. Mien Oma see immer to uns Enkels: „Du musst immer achtgeven up dien Fööt, de moot immer warm ween. Sonst kannst du flink Gripp kriegen, Hals- und Lievpien.“ Recht harr se. Windpocken, Masern un anner Kinnerkrankheiten geev dat ok. Uns Moder harr immer een Huusrezept paraat. Doktor geev`t nich. As mien Süster Mumps kreeg, wurdt hör Gesicht mit een Kökendook tosomen bunnen un wedder liek trucken. Se schull doch nich hör ganz Leven mit`n scheef Muul rumlopen. Un bi Verrenkungen hulp „Essigsaure Tonerde.“ Pien in Hals wordt mit Kartuffelbree bekämpft.  

Ohrenentzündungen worden mit Kamill oder heet Kunsthönnig behannelt. Uns Opa nehm för sien Maag ok woll maal Natron, rülpsen dee he denn immer daarna. Aver Natron schull mit de Tied nich alto gesund ween, hett he denn ok nalaten.

 

Ja, so weer dat fröher. Wenn man dat al so bedenken deit, weern de Huusmittel doch ganz good. Schaapwullstrümp tegen kold Fööt un  Schaapwullhandsken tegen kold Hannen gifft dat nich mehr. Bloot noch dörsichtig Flunten. Wenn wi alltosomen daaröver nadenken doot, kann ik mi denken, dat veel Geld intosparen weer, wenn wi uns sülvst helpen doot. Denkt daaran, dat ji immer warm Fööt hebbt.

 

Rudi Rabe

 

17.11.2008

 


© 2008 Rudi Rabe Veröffentlicht: 05.12.2008 um 13:18:16 Uhr
Dieser Text wurde 8969 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)