|
24136134 Besucher seit Einrichtung am 15. Oktober 2007
|
|
| De Gootschien toon Brunch Lisa un Gerd hebbt to Wienachten von Vadder een Gootschien toon Brunch schunken kreegen. Nu is dat all Harvst un de Gootschien liggt ümmer noch in’t Schapp. Gerd sä: „Wi hebbt doch Urlaub, nu laat us man de Gootschien inlösen. Vadder köönt wi mitnehmen, denn de sitt ümmer alleen in sien Wahnung un brunchen kennt de seker uk nich.“ För Sünndag Klock 11.00 wurd een Disch bestellt.Dat Lokal hett een gooden Naam, eerst för een körde Tied wurd allens na ‚Feng Shui’ inricht. För de dree weer een Finsterplatz in’n Wintergoorden reserveert. Na een körde Tied ward se fraagt, wat se woll drinken wull’n. Gerd harr geern Koffi, Lisa un Vadder bestellden Tee, swarten Tee. De Bedeenung bröcht dat Gewünschte. „Oh, dat is dat Geschirr, wat wi to Huus ok hebbt“, segg Lisa. „Aver wi hebbt een Kann mit een heele Tüll un ok kien afknabbert Teetass!“ Bi lüttjen harrn de dree Smacht. Dat kolle Büfett weer all goot afrümt. Kakte Eier weern ut. Naja, een Brötchen, sülvst backte Rosinenbrötchen, kunnen se woll eten. „Mann, dor kann man sik de Tänen dran unbieten. De sünd blots toon instippen in Tee to geneten“, segg Lisa. Vadder bedeende sik glieks an’t Middagsbüfett. Swiensbraden, Rotkohl un Tuffels. Na een Tied sehg he an een annern Disch, dat dor well an Sopp lepeln de. He fröög Lisa of dat ok Sopp geev. Lisa antert: „Ja, Kürbissopp!“ „Nee, dat is nix för mi! Denn hal ik mi leever noch een Naslag.“ Ja, un nu weer nix mehr mit Swiensbraden; kien Hähnchen, kien Fisch. Teihn Minüten hebbt se luurt, bit dat Swienfleesch nabracht wurd. As Lisa, Karl un Vadder eer Nachspies eten, sett sik doch glatt dat Personaal, dat heet, de Kook un de Bedenung an’n Nebendisch, stekten sik een „Glimmstengel“ an un qualmden de Bude vull. So veel man to ‚Feng shui’. „Nee“, sä Lisa, „dor bliev ik doch leever in Huus, kaaken kann ik ja, us Geschirr is heel un kommodiger is dat ok.“ Se hebbt ok kien Gootschien weer kreegen. Erika Bohlen |
| © 0 Christa Arntz |
Veröffentlicht: 09.03.2023 um 11:05:38 Uhr |
| Dieser Text wurde 5522 mal gelesen. |
|
|
