de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6046903 Besucher seit Einrichtung am 15. Oktober 2007


 

 

De Paster mit uns Meßkaar

 

In de slecht Tied harr bold jedereen van de Juisters een Garden in de Dünen. Uns Paster weer daar beter dran, denn sien Garden weer gliek achter sien Huus. He plant genauso as al de anner Insulaners sien Gemüs un sien Blömen sülvst an. Bi uns geev dat immer veel Meß van uns Veeh un jedereen wull van de Schiet so to seggen as Dünger för hör Gardens hebben, daarmit allens beter wassen un bleuhen kunn.

 

Uns Paster gung dat genauso. Aver he harr dat mit uns Vader verdürven, dat kunn he hüm nich so flink nich vergeten, he harr hüm een Huusdöp utslagen. Man „Goden Dag“ un „Goden Weg“ seen se sük all Dag. Dat weer ja in de Nahberskup, daar keem man ja nich butento.

 

Also keem eensdags uns Paster un wull een Wagen mit Meß bestellen.

„Ja, geern,“ see mien Vader, „geern Herr Paster, aver in Ogenblick hebb ik kien recht Tied... un in de nächst Dagen is dat ok woll nich mögelk. Se könt aver soveel Meß van uns Hoff holen as Se mögt un een Schuuvkaar will ik Hör ok woll utlehnen.“

 

De Paster wull sien Garden fertig maken un daarum keem he na twee Dagen torügg mit sien Gummistevels. Nich in sien Talar, dat is ja woll klar, sünnern slicht un eenfach. De arm Keerl quäl sük of mit Förk un de swaar Meßkaar. Mien Vader griende sük in de Füst – nu kunn he de Paster maal sweten sehn. De Sweetdrüppen lepen den Gottesdener man bloot so van`d Kopp hendaal. Dree Kaar Meß hett he sülvst in sien Garden kaart. Denn see uns Vader to hüm: „Herr Paster, vannamiddag kann uns Knecht Hör woll een Wagen Peerschiet bringen...“ De Paster weer recht blied un bedank sük bi mien Vader för dat Angebot.

 

Na een Week wull de Paster de Schiet betahlen. Uns Vader see to hüm.“ Nee, dat köst för Se nix, Se hebbt mi ja hulpen, dat ik de Meßhopen van Hoff rünnerkreeg. So sünd wi ja beid hulpen. Aver Se köönt mien Froo een fein Freud maken un hör een lüttjen Zirenenstruuß ut Hör Garden bringen.“

 

Ik froog mien Vader: „Waarum bruukt de Paster nix betahlen?“ Vader see: „ Mien Kind, dat versteihst du nich! Ik wull doch bloot een Paster bi`d  Arbeid sweten sehn.“

 

Marieluise Stolper

06.03.2009

 


© 2009 Marieluise Stolper Veröffentlicht: 06.03.2009 um 20:10:28 Uhr
Dieser Text wurde 10119 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)