de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6047446 Besucher seit Einrichtung am 15. Oktober 2007



Jugend-Swemm-Pass

 

Freei-Swemmen un Fahrten-Swemmen dat harr ik! In’t Husumer Swemmbad dicht bi uns Kreisstadt Jever weer’n wi Gören so faak as dat man eben mögelk weer. Elke freei Minüt hulln wi uns daar up. Min Baadbüx harr meest kin Tied to drögen. Faak bleev he ok man gliek an’t Waskelien in’t Swemmbad hangen – ik keem ja all bold wedder. Mörgens tüsken seß un söben Ühr weer ik all in’t Water, all lang för de Ünnerricht in’t School.

 

In’t Nicht-Swemm-Becken bruuk ik nich mehr rin – min Freei-Swemm-Breev un min Fahrten-Swemm-Breev harr ik. Wi tummeln uns in’t Freei-Swemm-Becken rüm. Ik maak all mit: Wett-Swemmen, Kraul-Swemmen, Rügg-Swemmen, Bost-Swemmen, Tagfalter-Swemmen, een van achtern answemmen un ünnerdukeln, duken, van dat Ponton woll teihn bit fievteihn Maal rüggels in’t Water fallen laten so achternanner weg, in’t Vörbigahn de Jungkeerls anschupsen un in’t Water smieten. Tja, de Jungkeerls weer’n ja ok nich dumm, de holln mi fast – un denn plumps – weer ik mit in’t Water. Tja, so weer dat.

 

Un ümdat ik un de annern so wild in’t Water un an Land weer’n, wull min  Swemmlehrer, dat ik de Jugend-Swemm-Schien maken sull. Na ja! Man to! Binnen twee Maant sull ik dat klaarbrengen. Wat mutt ik denn maken?

 

Punkt een:                 Strecken-Swemmen:           bestahn

Punkt twee:                Fell-Swemmen:                    bestahn

Punkt dree:                Rügg-Swemmen:                 bestahn

Punkt veer:                Streek-Swemmen:               bestahn

Punkt fiev:                  Teller-Duken                         bestahn

Punkt söben:             Transport-Swemmen:          bestahn

Punkt acht:                Baderegeln                           wuss ik

 

Punkt seß:                 hebb ik Swierigkeiden mit! Denn Punkt seß weer’n Moodsprung van dat Dree-Meter-Sprungbrett. In de Vörschrift stunn: Mutsprung: aus drei Meter Höhe (Wassertiefe 3 bis 3,5 Meter). Un hier leeg de Knackpunkt: Weer ik nich immer so wirbelig in’t Water wesen, weer ik dr woll mit’n Foot-Sprung vanaff komen. Aber: Straaf mutt sin – anners is dat nich gerecht: Een Kopp-Sprung mutt dr her. Dat weer vör mi tovöl, dat weer’n Moodproov, de schaff ik nich. Ik klauter up dat Sprungbrett un tippel na vörn. Nee, Koppsprung, dat kunn ik nich. Ik holl min Nös mit Duum un Wiesfinger dicht un maakt’n Footsprung van dat Dree-Meter-Bredd. Min Lehrer schüddkoppt. „Nee, nee, min leve Deern, so geiht dat nich, een Koppsprung mutt dr her.“ „Dat kann ik nich, ik maak anstatt een Koppsprung dartig Maal een Footsprung van daar boven!“ Noch een „nee, dat geiht nich!“

 

Ik weet bestimmt, ik land toeerst mit min Buuk up dat Water – also’n Buuk-Klatscher. Denn harr ik dr wat mit, denn weer min Buuk ganz rood. Een Koppsprung van dat Ponton: na ja, dat kunn ik woll utholln, hier weer’n wi ja ok immer wild achternanner an.

 

Ik Waterrött harr nu sovöl Schiss bi dat Springen. Ok na de Tied van de twee Maant kreeg ik dat nich klaar.

 

Also dat Fazit: ik hebb de ganz Jugend-Swemm-Paß nich schafft, denn de Freei-Swemm-Schien un de Fahrten-Swemm-Schien reich nich ut. Is ja ok richtig. Eets bün ik aber ok ganz good „ohne“ dör min Leven komen. Vandag denk ik dat so! Aber as halvwussen Schooldeern weer dat en Blamage. Tominnst vör’n paar Daag.

 

Dat mi aber nüms up den Gedanken kummt ik weer nich mehr in dat Swemmbad gahn. De liggt komplett verkehrt. De Tied na de Jugend-Swemm-Paß-Prüfung weer doch genau so moi as de vör de Prüfung.

 

Karin Steiner

30.06.2009

 

 


© 2009 Karin Steiner Veröffentlicht: 30.06.2009 um 22:19:25 Uhr
Dieser Text wurde 7683 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)