de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6051228 Besucher seit Einrichtung am 15. Oktober 2007


 

De Mathematiker

 

Droopt sük na veelen, veelen Jahren twee Schoolkameraden. Dat weer een groot Freud. „Minsch, wu geiht di dat?“, weer natürelk de eerst Fraag. Denn aver glieks gung dat Vertellen van fröher los. Natürelk keem de Fraag, wat ut hüm wurden is. Willi seggt: „Ik bün Busfahrer wurden, fahr de Lüü dör de Gegend, maakt bannig Spaß, Kenn bold ganz Dütschland. Segg mal, wat büst du denn hüt?“

„Ik,“ seggt sien Schoolfründ Hans, „ik bün Mathematiker.“

„Mathematiker, wat is denn dat, kann man denn daarmit Geld verdenen, wat maakst du denn as Mathematiker?“, wull Willi glieks weten.

„Minsch Willi, ik bün sogar Professor.“

„Denn mutt ik di woll mit Herr Professor anreden, wat?“, see Willi, „aver segg mal, wat maakt denn so`n Mathematiker?“

„Büst woll mall un mi mit Professor anreden, hebbt doch mitnanner up een Schoolbank seten. As Mathematiker maak ik Rekenupgaven,“ antwoor hüm Hans.

Willi fraagt: „Un daar kann man van leven? Dat musst du mi mal verklaren. Wat sünd dat denn för Upgaven?“

 

„Ja. wu sall ik di dat so eenfack verklaren?“, meen de Professor, „in de School weerst du ja nich so good in Reken. Ik will di dat an een ganz eenfack Upgaav klarmaken. Pass mal up! Wenn du teihn hest un treckst elven of, hesst du mathematisch minus een, leggst du een daar wedder to, hest du nix, mathematisch null komma nix. Hest du dat kapeert? Mien Upgaven aver sünd natürlek veel komplizerter, aver laat uns lever van fröher vertellen.“

 

Se hebbt noch lang tohoop klönt. As Willi na Huus kummt, fraag sien Froo glieks: „Na, wat is denn ut dien Schoolfründ wurden?“

„De,“ seggt Willi, „de is Mathematiker un sogar Professor!“

Sien Froo fraagt: „Mathematiker, wat is dat denn?“

„Ja,“ seggt Willi, „dat hett mit Reken to doon. Pass mal up, he hett mi dat so verklaart. Wenn to`n Bispeel in mien Bus 10 Mann instiegt un 11 Mann stiegt ut, denn mutt glieks wedder een Mann instiegen, daarmit daar keeneen mehr in Bus is!

Süh, dat is Mathematik. Ik hebb dat glieks kapeert.“

 

C. Fr. Bautsch

25.07.2012

 


© 2012 Carl Fr. Bautsch Veröffentlicht: 25.07.2012 um 16:18:16 Uhr
Dieser Text wurde 10347 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)