de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6046801 Besucher seit Einrichtung am 15. Oktober 2007


Gedanken üm de Wiehnachtsmann  

 

De lüttje Jannik fragt sien Vader: „Gifft dat een Wiehnachtsmann un wo wohnt he? Hett he ok een Wiehnachtsfroo un hett he ok Kinner?“ Wat schull Vader daarto upmal seggen? Ganz ohn Antwoord kunn`t ja nich blieven, wenn sien Jung na wat fragt, denn mutt he ok een Bescheed kriegen. „Ja,“ seggt he to sien Jung, „ganz bestimmt gifft dat een Wiehnachtsmann un ik glöv, he wohnt ganz boven in Nörden wo Ies un Snee liggt. Of he ok een Wiehnachtsfroo  un  ok Kinner hett, kann ik di tomaal nich seggen, daar moot ik nakieken, datt segg ik di mörgen  Büst`d daarmit inverstaan?“ Daar harr Wilhelm, Jannik sien Vader, noch gaar rnich över nadacht un ok noch ni wat hört van een Wiehnachtsfroo un Kinner van de Wiehnachtsmann. Wu is Jannik daar bloot up komen, sükse Fragen to stellen?

 

Dat leet Wilhelm kien Ruh. As Jannik in`t Bett weer, leet he sien Froo Miki alleen vör`d Kiekkasten un verkroop sück in`d Nebenstuuv. Daar stund sien Bökerschapp un ok sien Computer. Toeerst greep he na sien grood Lexikon: ...Weihnachtsfrau – Weihnachtskinder... Över Wiehnachtsfrolü weer allerhand to lesen, aver weer de Wiehnachtsfroo mit de Wiehnachtsmann verheirad? He kunn nix finnen, wat daarup henwiesen kunn, dat de Wiehnachtsmann un de Wiehnachtsfroo tosomen hungen. Un Kinner van de Beiden? Daar geevt`t erst recht nix to lesen. He smeet sien Computer an un söcht in de wiede Welt na Kinner van de Wiehnachtsmann.

Kien Resultat, kien nix. Allens düd daarup hen, dat de Wiehnachtsmann kien Kinner harr un ok woll nich verheirad weer.

 

Wilhelm keem to`n Schluß na all sien Taxeeren, dat de Wiehnachtsfroo doch  bloot dat Utfinnen van de Reklammakers weer. Un Kinner harr de Wiehnachtsmann ok nich, dat stund ja nu woll fast. Aver wu schull Wilhelm dat sien Jung verklookfiedeln? He harr hüm ja versproken, hüm een Antwoord to geven. Wilhelm kenn sien Jung to good. Kunn he kien Antwoord kriegen, denn schoof he anner Fragen na. Un nu keem Wilhelm richtig in`t Klamüstern. He muss sück schlau maken över de Wiehnachtsmann. He holl sück een Zedel un een Schriever un schreev up:

 

Wu old is de Wiehnachtsmann?

Antwoord: He is al immer old ween un wordt ok nich öller, he blifft so as he is.

             

Is de Wiehnachtsmann ok na`d School hen gahn?

Antwoord: Seker, he hett de Grundschool un de hoog School besöcht. He moot ja good lesen, schrieven, reken un utlännisch snacken könen. Un mit de Geographie moot he sück ok utkennen.

 

Wo van leevt  de Wiehnachtsmann ?

Antwoord: De Wiehnachtsmann is fast instellt bi de Wiehnachtsbehörde. Dat is een groot Amt mit ganz veel  Himmelsdeener un Engels. Geld kriggt he nich, daarför aver Eeten un Drinken, free Wohnen un he kriggt de Fahrtüüg umsünst. De Rendeerten un de Peer moot he versörgen. He hett aver Hülp daarto.

 

Wat maakt de Wiehnachtsmann wenn Wiehnachten vörbi is?

Antwoord: Toeerst moot he sück düchdig verholen, so nevenbi maakt he sien Papierkram. Denn geiht he erst Maal  över een Vierteljahr in d` Kur. Un so in Fröhsömmer fangt he an mit de Vörplanungs för dat nächst Wiehnachtsfest: Wunschzedels insammeln, Geschenke inkopen, verpacken, Routenplanungen maken unsowieder.

 

Sien Ogen fullen hüm bold to, so möi weer he. Miki weer al in`t Bedd gahn un nu gung he ok to Bedd. Inslopen kunn he aver nich, hüm gungen noch so veel Gedankens dör sien Kopp. Sien Jung schull ok allens weten, kien Fraag schull open blieven. Denn schleep Wilhelm doch in. Un in Droom seeg he immer wedder de Wiehnachtsmann mit sien Schlee und mit dat Peerd. De Schlee weer vullpackt mit Paketen un dat Peerd harr düchdig wat to luken. Wilhelm föhl sück wedder in sien Kinneröller torüggsett.

 

Dat weer doch kien Glockengebimmel? Nee, de verdammt Wecker waakt hüm up.  Schaa, he harr noch so geern wiederdröömt. Aver nützt nix, he muss rut ut Bedd. Siene Plichten repen! Miki stund ok up un so fung de Dag an wi jeden Mörgen, bloot dat hüüt Jannik mit siene Frageree keem: „Hest du  d`  rutkregen, of dat een Wiehnachtsfroo gifft?“

  

Rudi Rabe

 

15.12.2007


© 2007 Rudi Rabe Veröffentlicht: 05.12.2008 um 13:18:16 Uhr
Dieser Text wurde 13494 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)