de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6047688 Besucher seit Einrichtung am 15. Oktober 2007


Krieg tüschen Süderwall un Jücherstraat

 

„Dat givt weer Krieg“, segt Hannes, „de van´t Jücherstraat sammeln sück al“. We, de Naberskinner van´t Süderwall, we sünd noch nich so wiet. Toerst mutten we uns Reef up Stee bringen. Ick har mien Plastik-Pistol mit Knallpapier. Moi luut is se, man kannst du mit de Dingers de ut Jücherstroot verjagen? De lacht uns wat. Dor mut wat her, wo du richtig mit scheeten kannst. Ick söch tüschen uns Appelbööm na een richtig stabilen Astgabel un fund ook een. „Deiht me leed, Moder, up een paar Appels must du in´t Harvst verzichten“. Mit mien Fohrtenmest schnitz ick een heel moi Zwill drut. Een van Mudders Gummiringen fört Inkoken mutt ok herholln. De givt de nödig Fohrt för de Krampen. De annern van´t Süderwall hevt ook al uprüst. Man we scheeten nich mit isern Krampen, nich mit de runddreiht Nagels, we mookt uns welke ut de Bladen van´t `Anzeiger för Harlingerland´.  Mit de kannst nümms de Oogen utscheeten. Nun könnt de Wichter wiesen, wu flink se mit eer Fingers sünd. Se dreihen uns de Munition. Bold leeg dor een groot Barg Krampen ut Papier vör uns. Nun könnt de ut Jücherstraat komen!

De ut Jücherstraat, mit de willt we nix toe doen hemmen. Dat wer so, as in fröher Tieden tüschen Dütschland und Frankriek.  Ne, anner Kinner as we sünd dat ok nich, man, se sünd ut Jüchertraat. Dat langt!  Jahren later kweem uns lütje Jung ut School: „De ut de 2b sünd blöd“. Ick frog hüm: “Wuso dat denn?“ He: “Wiel se in´t 2b sünd“. So wer dat ook mit uns und de ut Jücherstraat.

We schickt uns Kundschafters ut. De ut Jücherstraat wogt sück all bit in´t Steenstraat rin, man dat is uns Kuntrei. Dree van uns mit de grötste Moot, de wagen sück vör. Scheeten een erste Salve van Papierkrampen af, mit Spucke nat mokt, dat piert beter. Vant anner Siet een ganze Schwarm van Krampen. Sünd dor ook welke ut Isen dorbie? Dat kann mall wurden. We sünd an´t wieken und bösseln gau de Straat endaal. In de Lohne van Edzards verpusten we uns. Ick sammel mien Reef, lad mien Twille mit een nee dreiht Papierkramp un loop üm de Eck - mittenmang in de Arm van uns Stadtsheriff Pasternak. De greep mit sein grode Handen mien Zwille. Konfiszeert! Net so maakt he dat mit de annern. Ut is de Krieg tüschen Süderwall und Jücherstraat.

Wenn ick vandag van Krieg hören doe, un dat is vööl toe foken, dann denk ick af un an: was doch moi, wenn dat dor ook so een ganz groode Hand geev, nett so as de van Pasternack, de hör al de Doodmakers ut Hand haut.

Anneus Buisman
29.01.2017

 

 

 


© 2017 Anneus Buisman Veröffentlicht: 29.01.2017 um 16:45:46 Uhr
Dieser Text wurde 3392 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)