de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


6047672 Besucher seit Einrichtung am 15. Oktober 2007


Geisterfohrer op de Autobohn 

Dat weer so ´n scheunen Altwieverdag, de Sünn scheen an en Harvstdag, as weer dat Summer un ik weer mit mien Benzinkutsch op de Autobohn. Mien Auto weer vull mit scheune Appels ut dat Ole Land. Op mol keem ik bi Lümborg in en Stau. Dor güng gor nix mihr. De Schieven harr ik rünnerdreiht un keek, wat so de annern Autofohrers moken deen. Mennigeen steeg ut, damit se beter sehn kunnen, wat dor passeert weer und wannnehr dat viellicht wietergahn dee. En Anner puhl sik jüst in´e Nees. Vele weern mit jemehr Smartphone togang. De Fro vör mi möök sik mit en beten Schminke torecht – se harr villicht en wichtig Verafreden oder wull na ehrn Leevsten hen. In en anner Auto weern Kinner an´t Quängeln. "Ik mut mol Pipi moken!", hör ik een vun de Kinner seggen. De twee Siedendörn vun´t Auto güngen open un twüschen disse Dörn seet sik een vun de Plagen hen. En lütt Rinnsaal leep ünner dat Auto op de Straat. Ik müss smüstern. Noot mokt erfinderisch. Achter mi weer en Auto mit dree Froonslüüd. Ik wull mi de Tiet so´n beten verdrieven. Dor nehm ik en Korf mit Appels un güng na de Froonslüüd achter mi. De Schieven harrn se ok rünnerdreiht. Ik froog, wat se sik nich de Tiet mit en Appel versöten wulln. 

"Jo", seeg de een, "de Appels hebbt mi al en ganze Tiet anlacht.". Wi snacken un lachen noch en ganze Wiel. Dor keem en anner Autofohrer dorto. Ik markde, watt he na de scheunen Appels hinkieken dee. "Wüllt se ok en Appel hebben?", froog ik em. "Jo, geern", seeg he. Ik keek na de Appels daal, de dor in´n Korf op de Straat stünnen un wedder na em. Na een Wiel seeg ik: "Bücken müsst du di al sülvst!" un wies mit de Hand na de Appels. Wi müssen altohop luut lachen un he greep sik gau en scheunen, roden Appel. Jedeen wüss so´n beten wat to vertellen un wi kregen gor nich mit, dat wi al en ganze Tiet töven deen. Denn keem de Gendarm mit sien blaue Minna anfohrt un reep dör sien Luutspreker, dat dor en groot Karambolasch weer. Dat schull seker noch en ganze Wiel duern, bet dat wedder wietergeiht. Wi schulln man wennen un in de annere Richtung bet no de nächste Utfohrt föhren, wo dat egentlik op de Autobohn ropgeiht, un de Autobohn verlaten. Ik heff noch nie nich so vele "Geisterfohrers" sehn, de all in de verkehrte Richtung op de Autobohn föhren deen.

Horst Rübke
18.08.2017


© 2017 Horst Rübke Veröffentlicht: 18.08.2017 um 12:20:52 Uhr
Dieser Text wurde 4378 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)