Bin
ik so hässli?
Bin ik so
hässli, as ik jümmers op Biller utsehen do? Un sünnerli op dat Passbild! Dor
mag ik mi gornich lieden. So kann ik doch nich utsehen, denn harr ik je wull
keen Frünnen op de Welt. Un en Fru harr ik wull ok nich afkregen.
Man nülichst
hett mi en vertellt, worüm dat so is, dat en sik nich lieden mag! Wiel wi uns
in’n Spegel jümmers siedenverkehrt sehen dot, kümmt uns dat op en Bild ganz
verkehrt vör. So sehen wi uns je nie nich.
Dat hett mi
je nu wedder beruhigt un ik mag mi wedder lever lieden. Un op mien Passbild un
den Föhrerschien, dor bruk ik je sülven nich op kieken, den kriegt je blots
anner Lüüd to sehen, de ik nich kennen do! Un dat is mi denn ok egal! Gerd Thiessen
Kinnerlarm
Dor ward je jümmers lamenteert, wat wi doch
in Düütschland nich noog för Kinner moken doot; vele seggen, wi sünd
kinnerfiendli instellt. Ik glööv, dat is överdreven! Gegen Kinnerlarm is nix to
hebben, man blots dor, wo dat ok henhört!
As ik nülichst bi en Konfirmatschoon in de
Kark weer – dat sünd je Daag, denn is de Kark bet op de letzten Platz besett –
do hebbt dor twee, dree ganz lütte Kinner de ganze Tiet weent un schregen,
kunnst nix mehr vun de Wöör vun den Paster un vun de Konfirmanden verstahn.
Man, wenn du denkst, de Mutters or
Grootmudders sünd mit de Quarksterten en beten an de Luft gahn, dat de sik
beruhigen kunnen or mienwegen buten wieterschriegen, denn liggst du verkehrt.
De hebbt gor nich doran dacht! Un wenn du wat seggst, de büst du en bösen
Minsch un Fiend vun de Kinner. So süht dat ut! Gerd Thiessen
|