Mien Droom

Nülich heff ik mi lang un düchtig mit Politik utenannersett.

Ik heff Politikers ut´n Bundestag dropen, för de dat nich bloots en goot betahlter Job weer. Ne, se wullen de Lüüd good tohören bi ehr Sorgen un jem hölpen, för de Tokunft wat beter hintokriegen. Wenn en Politiker ut en anner Partei en beter Argument or Infall harr, denn hebbt se sik tohop sett un för de Lüüd dat Best dorut maakt. Un dat, wat se toseggt hebbt, dat hebbt se ok inhollen. Dor kunnen de Lüüd sik op verlaten.

Disse Politikers hebbt nich bloots för de poor Johren vun ehr Wahltuur dacht, nee, se hebbt Ideen uttüfftelt, wo ok de tokamen Generatschoonen mit torecht kamen.

De mehrste Tiet slop ik jo so, dat ik mi an´n annern Morgen nich op mien Droom (Traum) besinnen kann. Avers dütmol güng dat. Ik heff mi reinweg argert, dat dat man bloots ´n Droom weer.

Eckhard Lakowski
08.07.2021