de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


13355439 Besucher seit Einrichtung am 15. Oktober 2007


Korona is nich glieks Corona 

Bün nettakkraat för´t Husdör, dor röppt uns Dochter up mien Handy an: „Vader, wu hest Du di dat nu vörstellt to dien Namensdag? Schölt wi wer s´namiddags komen?“ „Mokt man. An´t Vörmiddag komen mien Kumpels van´t Kegelclub. Denn hebb ick de ganze Korona up een Mal, dat is en Avwasch. Komt je man, as we dat wehnt sünd“. „Vater, bruuks nich so to bölken. Me falln all de Ohrn aff.“ Ick minner mien Stimm: „Tschüss mien Deern!“ Denn hevt we ja all kloor, denk ick bi mi. Wink noch eben de nee Naber to, de vör sien Huus steiht. Denn kann de Dag komen.

Ick gah in mien Wohnen, sett mi in mien kommodige Stohl und les in de Schmöcker van Lothar Englert „De holländisch Brill“. Is doch interessant, wu dat Weten van uns Minsken ümmer een Stück wieder komen is. Vör´t Hus mitmol en Sireen und blau tinkelnt Lucht. Ick an´t Fenster. Steiht dor een Krankenwagen? Is dor een van uns Nahbers krank worden? Man good, dat mi nix fehlt. Lüttje Sett later Fuustschlee tegen mien Dör. „Wat is los, könnt se nich, nett as sük dat hört, pingeln?“ „Nu maken se all gau up, we sünd Gendarms!“

Ick de Dör openreten un up de Lue to. En Dutzend Handen wiest mi torüch. „Gaht se gau in hör Wohnstuf und treckt se een Maske övert Snut.“ Mi tomoet sünd dor woll sess Lue, twee Gendarms und veer annern, antrucken as Minsken van´t Mars. „Uns is meld worden, se hebt Corona und dat nicht vör nödig hollen, uns up Gesundheitsamt antoropen. Nu sünd wi hier, ick bün van´t Gesundheitsamt“ so de Baas van de Trupp. He geiht up mi daal un holt mi so en neeimoodsk Apparat vör mien Kopp. Hevt ick all in´t Nahrichten sehn, denn, wenn Minsken up een Floogplatz ut een Hochrisikogebiet ankomen sünd. He kiekt up sien Apparat, denn givt he Meldung nah achtern: „Fever het he nich!“ He treckt een witte Stift ut een Plastiketui: „Nu mutt ick an hör Nös. Kopp nah achtern!“ He puhlt in mien Nöslock rüm. Föhlt sick aasig an. Ick schüddel mi. Denn deiht he de Stift up son lüttje Deel ut Plastik. „Nun mutten wi en lüttje Sett wachten.... blievt se up Ovstand!“. He wiest me twee Meter in mien Stuv rin. Denn treckt he de Stift wer rut. Schüddel mit de Kopp. „Se hevt keen Corona“. Dat haar ick hüm ok seggen kunnt. „Se mutten nich in´t Krankenhus. Dat Rettungsfohrtüg is unnütz mitkomen“.

Ick: „Wu kummt se drup, dat ick Corona hebb?“ „Hevt se doch sülvt seggt. Dor het uns een anropen und uns vertellt, dat se an´t Telefon seggt harrn, se hevt Corona“. „An´t Telefon?“ Nun schütt mi mien Naber wer in´t Sinn. Het he? Achter de Rügg van de en stevig Gendarm het he sück verstocken. Is nich ut Ostfreesland, het so´n avartig Dialekt. Platt, so hett he to mi seggt, dat versteiht he nich. Ich schall Hochdütsch mit hüm snacken, dat kunn he in Dütschland woll verwachten. - So en naare Fent. Het he wat mitkregen van de Schnackeree mit mien Dochter? Ick up hüm to “Hevt se dat allens in Gang brocht?“ Gau löppt he in sien Huus, ick kann noch sehn, wu he fell de Dör achter sück to haut. Wat hev ick den seggt in mien Handy? Hev ick denn van Corona schnackt? Nee, um dat Thema gung dat nich. Ick schüddel mit mien Kopp.

De Lue van´t Gesundheitsamt und de Gendarms packen hör Saken. „Kann wesen, se mutten vör uns Insatz betahlen.“ Bevör se ut Huusdöör gahn, seggt de en van´t Gesundheitsamt noch to mi: “We hevt keen Corona faststellt. Man to hör Sekerheit möten se een Week in´t Quarantäne blieven. De Gendarms hevt een Oog drup.“

Dat weert denn mit mien Namensdag. Ick roop uns Dochter an und vertellt hör de Geschicht. Se schüddel sück vör Lachen. „Vader, dat kummt, wiel du so ollerwelsch Worden kennst. Du hest mi vertellt, dat du an´t Vörmiddag de ganze Corona van dien Kegelclub bi di hest“. „De Korona van mien Fründen, een anner Word för de ganze Koppel, dat seggt man so - fröher tomindst.“ Und de unnöselige Fent tegen me, in de plattdüsk Spraak unkünnig, he hett meent, ick harr dat nee Corona, dat aasige Virus. Ick faat me an´t Kopp.

Dat schall he marken, so ick in mien Brass över mien Nahber. Man, ick bün een Mann, de Freeden mag. Und Striet mit en Naber will ick nich hebben. Weetst wat, denk ick bi me, ick schenk hüm de Kurs, de de Volkshochschool in´t Programm hett: „Plattdeutsch für Anfänger“. Wenn he denn weer tohört, wenn ick an´t Handy bün, denn versteiht he tomindst, wat ick meen.

Anneus Buisman
02.12.2021


© 2021 Anneus Buisman Veröffentlicht: 02.12.2021 um 16:05:29 Uhr
Dieser Text wurde 304 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)