de-plattsnackers.de Logo!
Fotos
Trennlinie
Symbol Startseite
Trennlinie
Symbol Was ist Neu?
Trennlinie
Symbol Plattdeutsche Geschichten
Trennlinie
Symbol Plattdeutsche Gedichte
Trennlinie
Symbol Advent bis Silvester
Trennlinie
Symbol Wintergeschichten
Trennlinie
Symbol Frühlingserwachen
Trennlinie
Symbol Sommerfreuden
Trennlinie
Symbol Herbsterlebnisse
Trennlinie
Symbol Heimische Vogelwelt
Trennlinie
Symbol Historische Bilder
Trennlinie
Symbol Termine
Trennlinie
Symbol Autorenliste
Trennlinie
Symbol Wortliste
Trennlinie
Symbol Kontakt
Trennlinie
Symbol Persönliches
Trennlinie
Symbol Links
Trennlinie
Symbol Impressum
Trennlinie
Symbol Datenschutz
Trennlinie


13356120 Besucher seit Einrichtung am 15. Oktober 2007


„Charly Rivel“, mien Talismann

Een Beleefnis vun www.addi-kahl.de
 

Een Avend in Vörwiehnachtstieden an uns winterliche Küst un ik weer as Muskant anfordert, üm de bummelig hunnert Minschen in een REHA-Hotel bi ehr Adventsfier
kommodig to ünnerholen. - Dütt spezielle Huus is för Minschen mit Sehbehinnerung inricht wuurn, üm mal för ’n poor Daag de frische Ostseeluft in Timmdörper Strand
to geneten. Düsse Wiehnachtsfier hett een heel deepe Indruck bi mi achterlaten, wieldat ik dor so richtig gewohr würr, woanns sehbehinnerte Minschen ehr Schicksaal
dagdääglich so meistert.

Mit de fachkunnige Hölp vun ’t Hotel-Personal, Krankensüstern un Pleegers bit henn to Huusdaam un Direktor, weer de grote Saal stimmungsvull mit Dannbööm, Smuck, füürsekere Kersen un roote Wiehnachtssteern op de Dischen drapeert wurrn. - Bi
lecker Pletten, Koffe un Stuten würrn eerste Sehbehinnerte in denn Saal führt, de sik deelwies an de Hannen hölen orrer sik mit witte Blindenstöök so goot torecht fünnen, as wenn se dat allens würklich sehn kunnen.

Ik speel liesen bekannte Wiehnachtsleder un ok teemlich överrascht, as dat Gemurmel vun de Gäste jümmers lieser würr un eerste Stimmen textseker de Leder mitsüngen.- Dorna güng denn dat Koffe-drinken mit Pletten un Stuten los. - Na`n gode Stunn kööm gau de Huusdaam op mi to un fröög, op ik denn Wunsch vun
eene Daam tolaten würr, de geern weten wull, woanns de Muskant denn woll utsehn dö?....Ik kunn lange Tieden dorna düsse Minuten ni nich vergeten, as se, flankeert
vun de Huusdaam, snuurstracks op mi tokööm. - Mit deepbruune Ogen keek se mi an un ik dach irriteert: - „Dormit mutt se doch beten sehn können?“- In düsse Momang bleven se dicht vör mien Klaveer stahn! - Ik stünn vun mienwen Hocker op un güng verlegen na vörn. -„Dörf ik Addi to Se seggen“, - flüster se liesen.- Ik anter: „Avers geern doch!“ (Wat harr ik bloots för ’n egenoordige Kloot in Hals?) - Un böör dorbi beide Hannen hooch un tast vorsichtig över mien Schullern, Hals un Kopp un sääh mit lieset Lachen: „Un Hoor hett he ok nich mehr, jüst, as mien Ehemann Willi!“ -

Ik stünn dor mit ’n hitte Kopp! - Un denn böög se sik vör un sääh ganz liesen: „Ik müch Di wat schenken, Addi, - würrst Du dat vun mi annehmen? - Un in neegste Momang trööck se ut de Jackentasch een luurlüttje Figur, de as Miniatur-Utgaav denn legendären Clown „Charly Rivel“ dorstell un man de lütten Arms un Been beten verdreih’n kunn. Un denn flüster se noch gau: „Dat is mien Leven lang mien Talismann ween, denn heff
ik as lüttje Deern vun mien Opa schenkt kregen, un dortomaal hett he to mi seggt, düsse lütte „Charly Rivel“ schall Di een Leven lang behöden, mien Deern!“ Un noch liesen achternan: “Ik bruuk em all balden nich mehr un vun nu an schall he Di gehören un jümmers goot op Di oppassen. Veel Glück mit em, un mien Dank för Dien Musik!“ Drei sik mit denn witten Blinnenstock as Hölp üm tast se sik torüch na ehr ’n Disch.....

Ik sett mi wedder achter mien Klaveer, dat in düssen Momang as’n Schutzboorg för mi weer, deep anröhrt vun düsse Överraschung. - Hüüt noch seh ik ehr deepbrune
Ogen ünner de griesen Hoor vör mi. - Eerst beten later würr ik ok denn Bifall ut denn Saal gewohr. De lüttje „Charly Rivel“ steiht siet düsse Wiehnachtsfier in unsen Glasschapp un jümmers to Adventstiet bekümmt he in uns Wiehnachtsdeko denn schöönsten Platz, un denn seh ik in’t Erinnern ehr brummelbruun Ogen mit düssen luurlütten Grienscher...............

© 2022 Addi Kahl Veröffentlicht: 07.01.2022 um 16:22:24 Uhr
Dieser Text wurde 131 mal gelesen.

Diese Seite: Weiterempfehlen - Drucken


Footer

Diese Homepage wurde realisiert durch die Event- und neue Medien GbR. (Admin)