|
Swemmbad
De Sünn geiht up, de Dag wurdt heet,
bi`d Fröhstück hest du nu al Sweet.
Vandag setzt du dien Arbeid ut
un nimmst dien Fro un fahrst mal rut.
In uns Stadt gifft dat nich wied in Padd
een prima herricht lüttje Bad.
Daar kannst du swemmen un di sünnen
un ok maal wat moies günnen.
Du fangst an söken, söchst de Büx,
de Baadbüx, wat anners nix.
Se hett hier in disse Schapp noch legen,
se hett doch kiene Benen kregen?
Is doch gediegen, is een Schandal,
wo is se denn? Verdammt noch maal!
Ohn Büx, ja dat geiht doch nich,
de Lüd seggt sonst: „Wu flutterig!“
Schluss mit Söken, wurdst ja besopen,
musst di `ne neei Baadbüx kopen.
Musst mit twintig Euro reken
un dat Geld ok nich vergeten.
Un dien Madam, wat treckt se an?
Hör neei Bikini Marke „Stramm.“
He schall woll passen, rin in Tasch,
un denn man los mit Rad, Marsch, Marsch!
An de Swemmbaadkass musst du berappen,
se willt dien Geld ut`d Knipp ankappen.
Eerstmaal een feinen Platz utsöken,
daar achtern bi de beiden Böken.
De neei Baadbüx passt genau,
se is so moodsk un lett licht grau.
Dien Fro hett woll de letzt Maand to veel eten,
de Verschluss van hör Bikini is ofreten.
Ja, wat nu, de Böst ohn Boverdeel,
dat is för de Lüd un se toveel.
Kannst nix maken is even so,
daar passt ok kien breed Band ümto.
Du swemmst dien Runnen wied van Kant,
un diene Fro liggt nu in`d Sand.
Se kann nich bruun wurden un se flennt:
„Ik krieg kien Farv mit dat old Hemd!“
Un doch weer de Dag för se een Glück,
na dat vele Missgeschick.
Een neei Baadanzug kann se nu bruken,
tachentig Euro deit se van di luken.
De Dag weer doch noch een Gewinn
un geiht ok in de Geschichte in.
Tini, wat dien Fro is, moot ofspecken
un nich mehr soveel Ies un Koken slecken.
Un du, leev Fründ, musst ok dat eten
wat dien Fro ett, drüffst nich vergeten:
Mitnanner wenig Kalorien un Fett vertehren,
ok maal Beer un Wien entbehren.
Ja, de Sömmertied bring dat an`t Lücht
wat man in Wintertied up Rippen tücht.
Eet vernünftig, sparst ok Geld,
dat is dat Beste up uns Welt.
Rudi Rabe
18.06.2008
| 
