Sankt Nikolaus un Knecht Ruprecht

Nikolaus sin Naamdag is de 06. Dezember un daarum fiert de Kinner mit ehr Öllern dissen Dag.  Sin Naamdag fallt in de Wintertied un de Buren bringt ehr Vörraad binanner. Nikolaus is Fründ un Beschützer van all Kinner. In England heet he Santa Claus, in Holland Sinter Klaas. Annerswaar nömt man hüm Zinterklos, Sünnerklaas, Samichklaus, Nikolo of Helje.

Sin best Fründ is Knecht Ruprecht. Ok de hett in anner Gegenden een annern Naam: Beelzebub, Pelzprecht, Pelzmärte, Rasselbock, Klabauf of  Krampus. He hett'n  zottelig Pelz an un Roden bi sük. Knecht Ruprecht is dat groot Tegendeel van Nikolaus. Nikolaus is immer frünnelk un de Kinner kriegt Lohn wenn se stadig leev sünd. Knecht Ruprecht verdeelt Roden as Straaf wenn de Kinner biester weer'n över't Jahr. Nikolaus beoogt de Kinner dat ganz Jahr över un schrifft all up'n Zedel, daarmit he nix vergett.

Fröher in't Wintertied weer Nikolaus lang Jahren de eenzigst, de för all Kinner Geschenken brocht hett. Nu kummt ok de Wiehnachtsmann of dat Christkind. Wenn de Wiehnachtstied dichter bi kummt, treckt Nikolaus sin Stevels an, sleiht sin Piep ut un röppt na Knecht Ruprecht. De Slee mutt packt worden un nödig mutt se na't Eer um all Kinner een Geschenk to bringen.

Ünnern up't Eer leggt de Kinner een Grönkohlbladd mit een Stück Würfelzucker un noch een Stück Swartbrood up't Fensterbank of vör't Huusdör. Waarum? Dat is Foor för Nikolaus sin Grauschimmel. Wenn sin Grauschimmel so lecker Eten bi de Kinner kriggt, bedankt Nikolaus sük besünners bi de Kinner. He bringt Stutenkeerls mit Rosinen un een Piep mit, Slickereen, Nöten un Appelsinen. Knecht Ruprecht's Roo blifft in't Sack.

Sinnig fallt Sneei an't Nikolausavend. Nikolaus un Knecht Ruprecht smüsterlacht, se denkt an mörgen, wenn all Kinner ehr Nös an't Fenterschieven plattdrückt un een Geschenk findt in'n olen Strümp, in'n Stevel of up'n Wiehnachtsteller.

Karin Steiner

24.11.2008