Wiehnacht in uns Kinnertied

Wiehnacht in uns Kinnertied,

endlich weer dat nu sowiet

En golden Stern stund över d` Stall

in d` Himmel sungen de Engels all.

Jesuskind keem up de Welt,

so hett Moder uns vertellt.

Wiehnacht in uns Kinnertied,

Oh, wat weern wi Kinner blied.

De Kugels an de Wiehnachtsboom,

de seeg ik faken noch in d` Droom.

Zuckergood un Krinthenstuut,

weern wat för een Leckersnuut.

Wiehnacht in uns Kinnertied

Hoppelpeerd maak uns so blied

een Hampelmann, een Billerbook,

paar Hanschen un een moi bunt Dook

un een Pupp mit richtig Haar

seet mit Teddy up een Kaar.

Wiehnacht in uns Kinnertied,

oh, wu liggst du nu sowiet,

man Kersen mit ehr heller Pracht,

lücht nu ok noch in d` Wiehnachtsnacht.

Un wi hopt, dat wi dat find,

wat wi wünskt hebbt uns as Kind.

Annegret Neunaber

17.12.2010