Föhrerschien afgeven?

Dat hört en je af un an, dat öllere Lüüd friewillig ehren Föhrerschien afgeven, wiel se keen sekere Geföhl mehr op de Straten hebbt. Man dat fallt en wull nich so licht. En Seniorin in Westfalen, de 88 Johren old is, harr dat man lever maken schullt, denn weer ehr dat Malör nich passeert, wat se beleevt hett.

Se hett ehr Auto rüggels ut de Garaasch rutföhrt, wieter quer över de Straat, un de Fohrt weer denn vör en Ahornboom erstmol to Enn. Denn hett se dreiht un is wedder över de Straat föhrt, ditmol vörwarts un denn wedder in de Garaasch rin, man ohn Bremsen.

Dorbi hett se en Muer tweimokt un nu is de Garaasch nich mehr stabil, kann instörten. De Fruu hett en Wunn in’t Gesicht hatt un wurr in’t Krankenhuus bröcht. De Schaden alleen an Saken is teihndusend Euro.

Gerd Thiessen

26.10.2013