Een, de de Sünn upgahn lett
Mit verbiestert Gesichten,
so sitten we all in de Runn. jüüst eerst was de Döör open gahn. Dat Wicht van
de Rezeption, hier heet dat Anmeldung, harr uns all in de Ruum 4 rinstüürt.
Daar sitten wi nu. Kunnen wat beters anfangen mit disse Dag. De Mann, de sien
Rollator för sük hen schufft. De Froo, de mit hör Dochter komen is. Fast an hör
Hand. De mit de Ogenklapp. Nett as een van de Vitalienbröörs van ´t
Störtebekerspill in Mainhaaf. En annern hollt sien Hand fast up dat linke Oog.
He is woll up gauste Weg van sien Arbeitsstee hierher komen.
Nee, dat maakt keen Spaaß bi
d‘ Ogendokter sien Tied aftositten.
Mitmaal geiht de Döör mit en
Schwupps open. En Mann kummt rin. So in ´t beste Öller. Man kann hüm ansehen,
ut Oostfreesland is de woll nich. Tominnst sien Öllern mutten woll ut Afrika
wesen. Ik mark, wu mennigeen in d´ Runn stiev word.
He hett en lüstigen Spröök
up de Tung. Denn geiht he rüm un gifft elk un een de Hand. Snackt mit een un
anner. Fraagt, wu ´t geiht. De een kennt he woll. Snackt hüm in dat beste Platt
an, beter as ik dat snacken kann. Dat Wicht van d´ Rezeption kummt rin. Gifft
hüm en Breev un denn, mit fründelk Gröten is he al weer rut.
Man he hett wat daarlaten:
Dat Verbiesterte is weg. Een kickt de anner an. Daar snackt en Froo mit de Mann
mit de Hand vör ´t Oog: „Wat hett se denn herbrocht?“ „Kann ik helpen?“, seggt
en annern un brengt de Rollator van de olle Heer in de richtige Richt.
Utlööst dör een, de so ´n
ganz anner Klöör hett as wi annern. De seker ok up Minsken stött, de hüm nich
achten, hüm aflehnt. Man, wenn he de nahder kummt - wat för en Minsk. Een, de
annern good deiht. De, wenn du hüm tomööt kummst, dien Gesicht to ´n Smüstern
brengt. Un dat sülvst in de Wachtruum van en Ogendokter.
Anneus Buisman, Esens 18.11.2019
|