Herzlich Willkommen!

Neeijahrskoken

Wat ganz Besünners sünd bit vandag de Neeijahrskoken, Knipp- un Krüllkoken.

Woll in büld Familien in Stadt un Land geev dat Wafeliesder, mit de een ole Tradition verbunnen weer. Dat weer’n groot Tangen mit twee rund Klappen an een Ennen. An ehr Binnersied weer’n Biller, Figuren, Anfangsbookstaven van de Besitter, Wapen un Sinnbiller, de sük bi’t Backen in dat Mengsel indrückt hebbt un as’n moi Förm rutkemen. De fertigen, noch warm un bewegelk Koken wurr’n uprullt, also „gekrullt“, of in’n Trichter leggt. Elke Kookje weer wat Persönliks.

Vandag staht de olen Wafeliesder in’n Museum. Se hebbt ehr Deenst dahn, sünd dör elektrisch Apparaten oflöst worden, denn se mussen över’n gleunig Köhlenfür holln un daarbi faken ok noch ümdreiht worden. Dat weer Sweetarbeid!  Nu is dat all büld eenfacher. De Egenheid  is aber bi de elektrisch Wafeliesder verlorengahn.

Ut een handschreven oldjeversk Kookbook van 1818 hebb ik dit Rezept för „Neeijahrskoken“:

1 Pund Mehl,

12 Eier, van 8 Eiern dat Witt un van 4 Eiern dat  Witt nich,

¾ Pund Zucker,

¼ Pund affklart Botter,

¼ Loth Cardamum,

¼ Loth Canel

un bietje reven Zitronen;

dit mit een ¼ Kann Wien vermengen.

In’t Jeverland geev dat to Silvester buter Krüllkookjes de bekannt „Bambeußis“ oder „Balbeusches“. Un van disse Bambeußchen keem denn ok de Grötnis an Neeijahr:

„Prost Neeijahr, sünd de Bambeußchen al gaar?“ – Hierto bruukt wi:

1 Pund Mehl,

½ Pund Botter,

6 Eier un 6 Eier ohn dat Witt,

¼ Pund Corinthen,

¼ Pund Rosinen,

för 2 groot Rosenwater,

1 Lepel mit Brannwien,

1 Lepel van Hefe, fien sneden Zitrolenschalen,

½ Kann Melk – wenn dat Mehl fien is, anners wat weniger.

Allens klaar? Denn man ran an dat Mengsel!

Ik wünsk Prost Neeijahr un völ Spaß bi’t Backen.

Karin Steiner

09.12.2008