Herzlich Willkommen!

De vonne Hävenlogistik harn denn Wiehnachtsmann een Navi in denn Sleeden inbood. He wull dissen neemodschen Krom nich hebben, ober um det leben Freden Willens har he dann doch to stimmt. De Wiehnachtsmann mokte sek mit de Technik in een fix vertroot. He brukte nur noch dat Enn von sin Tour ingäben un de Sleeden mit de Rentiere wör em dor hänbringen. Inne Vostellung von sin Hävenlogistik klung dat ok ganz eenfach, de Praxis wör wisen ob dat ok so wor. De Christmaant käm und mit em de Wienachtsdag.All Sandhatter weren domit to süseln, (beschäftigt) de letzten Wiehachtsvörbereden to drepen. Inne Vorgordens un anne Hüser har man witte un bunt Luchterketten anbrocht. Öberall in de Hüsing rok dad no Zimt, Levkoken un anner krüsch Wiehachtsgebäcks. De Wiehnachtsbooms worden riinholtun for denn Obend utstaffert. De Sneefall, wecke annen Middach inset har, wor juemmer duller. Bald wer dat nur mit grode Maleschen möglich, mit de Koor vörwarts to kummen. De Kinner harn veele Weeken tofor all ere Wunschzeddel avgewen. Se freiten sik all bannig op denn Heligobend unn kunnen dat kum avtöven, dat dat oplest düster war.

Um dat töven op de Bescherung to verkorten holden veele Papas denn Sleden rut un trocken mit de Gören, Wiehnahsleder singend, innen Sledenkonvoi dört Dörp. De Mamas, de den Optrach harn, denn Wiehnachtmann rinn to loten, um de Gaven gau unnern Boom to leggen, wurn sacht hiddelig. De Wienachtsmann har sik in dit Johr noch nich blicken loten. Intwuschen wer dat veddel no veer. De Nach fung an, den Dach to vertrieben. Dat sneen wor immer duller. Gau har sik dat in Sandhatten rumspoken, de Wiehnachtsmann har an dissen Dach noch keen Gaven, be numms avgeven. Wo wer he bloß avbleven? Oder wern alle, ok de Ollern von de Gören int letzt Johr so brietig weden, dat se dit Johr nix bekummen schullen? Frogen över Frogen. De Gören, de dat Malheur ok mitbekämen fungen an to wienen. Se harn sik op dissen Obend so freit – un nu sowat, Wiehnachten ohne  Gaven. De Sandhatter repen bi Frünn un Bekannte in anner Gemeen an um notofrogen, op de Wienachtsmann dor ok noch nich weer. Gau stellte sick rut, de ganze Landkreis wer von denn Boortdräger all versorcht wunnen, nur Sandhatten har he wohl vergeten. De Grotenkneter un de Huntloser wern in de glückliche Laach, sachs mit de Bescherungen an to fangen. Santa Claus har allens ordnungsgemäß avlevert. De Boortdräger in  sinen roden Övertrecker schnalzte mit de Tung un sine  Rendeert  fleegen in Deepfluch Richt Sandhatten.

Mit dat Navi har he sik ok all anfrünt. As von de Hävenlogistik anpriesen, wer de Funktion dor. Man kunnt sik wieldat de Sleeden dör de Lüfte floch, kommodig op denn Bock trüch lehnen un een bitche dösen. Du moss  dran denken, an dissen Dach, Wiehnachten, möt jo hunderte von Gemeen innerhalv kordester Tied versorcht weern. Un in de lezzen Johr wer dat doch bannig schwor weden denn Sleeden ant jeweilich Enn to bringen. He, de Wiehnachtsmann, wer jo ok nich mehr de Jüngste.  Batz gnaasterte dat ganz fürchterlich an denn Sleeden. Dat Spannwark käm int trudeln un de Boortdräger versochte denn Sleeden woller unner Kontrolle to kriegen. Mit een  rechterhand Kurv un mit bannich reduzierde Fohrt käm de Sleeden  op Dack vonne Kegelbohn be de „Alte Post“ ton stohn. Innerhalv vun wenige Minuut har sik dat in Sanddhatten dörn Buschfunk rumsproken, dat de Wiehnachtsmann een Nootlannen oppe Kegelbohn avsolveert har. Över een gau herbrocht Leller, Heino Snieder har dat ut sin Blechbregenstuuv sehn, as de Wiehachtsmann oppe Kegelbohn runnerkäm, har he flugs sine Leller herbrocht.De Sleeden wor nu gau entlorn un de Gaven an de  intwuschen versomelten Gören und ehre Ollern verdeelt. All funnen, dat wer de beste Wiehnachtsobend, wat se je belevt hävt.

De Wiehnachsmann, he wer intwuschen vont Dack klattert, stellte sik to de Sandhatter un freide sik över eenen heten Wiehnachtspunsch, den een herbrocht har. Wann har man all de Gelegenheit, mit denn Boortigen länger to spreeken? Ni nich! Aver wie wer dat to disse Nootlannen kummen? De Bescheed käme furs: Sommerdachs wer de  Siren von de Fueerwehr no dat neede Fueerwehrhus umsett worn. De vonne Hävenlogistik harn vergeten, dat niege Hööchdehinnernes in dat Navi in to programmeren. Een Kufe vonn denn Sleeden har den Stülp vonne Siren kort anröögt  unn dörumm wer de Sleeden int trudeln komen. Mit min Homerslag krech Gottfried de krumm Kufe woller trecht. De Wiehnachtsmann bedankte sik bi alle Sandhatter for denn  nich in Plon  stonden Empfang. He wull, so sechte he, nächstet Johr rechttiedig dor ween. Mit een groden Ehrrund över de Kegelbohn käm he in Gang unn fleech Richt Norden.

„Verdammt nett Lüüd wohnt in Sandhatten“,dach he, „ dor bring eck neegsted Johr besunners veel Gaven hän“.
De Sneeflocken wern intwuschen wechtrocken unn an Heben gung een Komeetenswarm rünner. Wiehnachtlich Still käm woller no Sandhatten.