Historisches Bild

Herzlich Willkommen!

Moders Geburtsdag

De Tied geiht hen, is sünnerbaar,
vergahn is nu dat olle Jahr.
Moder hett Geburtsdag hatt.
Anfang Maant, stunn nich in d` Blatt.

To`n Ehrendag graleert wi di düchtig,
ganz inniglich un nich so flüchtig.
Dien Ümsörgeree maakt uns so blied,
wi dankt di daarvör alletied.

Daarmit du immer bliffst gesund un fit
bring ik di vandag wat mit.
Dat is een Glas vull Marmelaa,
to`n Eten egentlik veel to schaa.

Morgens een Lepel in dien Mund
is geschmackvull un ok gesund.
Se lett sük strieken wunnerbaar
un is so moi för Nagels un dat Haar.

Se schmeckt kold un ok warm
un aktiveert tomaal dien möden Darm.
Un letst du se lopen up de Tung
deit dat good för Hals un Lung.

Vörigt Jahrhunnert büst du geboren,
denk hüt ok mal an diene Ohren.
Un de Inhalt nich to gloven
is ok good för diene Ogen.

Do Goods för dien ganz lüttge Hart
denn wordst ok Hunnert und bliffst zart.
Eet de Marmelaa un bliev froh,
immer rund is denn dien Po.

In den dicken Appelsaft
sünd Vitamine för de Kraft.
Un de Orange helpt dien Gedächtnis,
is Garantie un een Vermächtnis.

Un drinkst du toveel Wien un Beer
denk an diene Nieren, nich ut Pläseer.
Nimm maal `ne Bris un nich verzagen,
drückt di maal dien vulle Magen.

Un doot di sehr de Been un Arms
röhr de Inhalt in wat Warms.
Een Lepel van de Bioware
weckt di up ut diene Starre.

Un geihst du avends möi in Bett
nasch daarvan, ist good för dien Skelett.
Kleevt bi`d Küssen ok dien Mund
is de Marmelaa doch ganz gesund.

Hest du d` Glas los, nix mehr in,
wasch dat ut, di kummt in`d Sinn:
„Ik kann`t gebruken för dit un dat,
för Cents un Knöp un anners wat.“

Rudi Rabe

15.10.2007