Herzlich Willkommen!

Tweespraak mit de Maand van Juist

Heet is de August-Sömmerdag,

so heet, dat de Insel in Stoom flimmert.

Fuul Drogde in Oortsmidden.

Minsk un Deert föhlt gliek. Ofköhlung hopent..

De Hitt van de Dag verlüst sük,

bi anstiegend Floot kummt een lau Drifft up.

De Schöpfung spört Erfrischung un nimmt dat dankbaar up.

Minsken amen dör un sünd sük een –

frisk Luft – Gott sei Dank!

De Nacht fangt an, glutrood fallt de Sünn in`t Water –

söcht se ok de Köhlung?

Duukt in in anner Gefilde.

Rosa farvt sük de Horizont! Maak good Sünn!

Nu tredd he in Aktion – in sien ganz Overmaat.

De Maand – Wachter van de Nacht!

Dat is Middennacht un dien Gesicht strahlt as siet Urtieden van`d Hemel,

witt-geel-rood.

Dien gütig Gesicht in scheev Hollen,

mien Maand van Juist!

Wu faken hest du mi so ansehen, kennst du mi?

Kumpel ut mien Kinnertied.

Troostmaker un Vertraude in Tieden van de eerst Leev

un van de Weltpien.

Wu faken weerst du mien Fründ in stillkens Tweespraak.

Hest mi heel angedaan mit dien sülvern, mystisch Lucht.

Vandaag strahlt dien Luchtkegel van glitzernd Pracht över de Watten.

Uplopend Floot lett lüttje, glänzend Wellen

spölsk mit leis Plattern tegen de Weiden rullen.

Dat Water is spegelglatt, süchst du dien Angesicht?

An`n Horizont: Dütskland – Luchten wenken heröver.

Wattvögels quarkt kauelig un find Erfrischung.

Se trippelt vör de Wellen up un daal,

se sökt frisk Eten, mitbrocht van de Floot.

Dat heet Wattenmeer knistert un dampt – man hört dat amen.

Mussel, Krebse un Würms find Hülp un Köst!

Bold is allens van de Floot ofdeckt.

Dat nich to sehn Leven is unner Water.

MAAND – du warkst in up de immerwährende Rhythmus van Ebbe un Floot –

leven un vergahn.

Kinner wordt bi Floot to Welt brocht,

mit de Ebbe geiht bi Dood ok de Seel.

MAANDNACHT – Faszination, daar strahlst du an`n Hemelstelt,

süchst du mi?

Ewig Ruh ut`d Weltenruum füllt mi.

De Steerns glimmen so as wenken se mi mit lüttje Arms to.

Ik aam deep dör un open mi un bredd mien Arms ut,

ik umarm di MAAND.

Haal mi een lüttje Stück van dien Kraft,

vertroo mi di an, find Ruh bi di.

Du lachst mit mi, du huulst mit mi.

MAAND – Kennst mi al siet Kinnerdagen,

hest mi överall geleidt – mi schütt.

MAAND van Juist!

Marieluise Stolper

09.08.2009