Versekerungsschaden

Versekerungsschaden

Geehrt Versekerung!

Ik bün nu in`t Krankenhuus un kann nu wedder schrieven. Ik moot Se bidden, verehrt Versekerung, mien Unfallschaden, so as ik dat beleevt hebb, uptonehmen:

Ik harr bi de Boo van mien lütt Huus noch Backstenen över un hebb se denn wegen de Drögd up de Spieker lagert. Nu wull ik aver för miene Höhner een Huck boen un de Stenen, de up de Spieker liggen, bruken. 

Ik hebb mi dacht, wu ik de Stenen am besten na ünnen kriegen kunn. Darr full mi in, dat de Spieker boven an de Huusmür een Dör hett. Dör disse Dör hebb ik een Balk verankert un daaran een lüttje Balk mit een Rull befestigt. Dör disse Rull leet ik een Tau hendör. An disse Tau hebb ik een Holtkist fastmaakt un hebb se denn hochtrucken. Dat Tau harr ik ünnen an een Pahl fastbunnen daarmit de Kist nich wedder hendaal fallen kunn. Nu bün ik up de Spieker stegen un hebb de Stenen in de Kist laden. As ik daarmit fertig weer, bün ik na ünnen gahn un wull de Stenen in de Kist ganz sinnig rünnerlaten.

Ik hebb dat Tau losbunnen, hebb aver nich daarbi dacht, dat de Stenen in de Kist schworer ween as ik. As ik dat marken dee, dat de Kist so schwor weer, holl ik dat Tau düchtig fast, daarmit de Stenen nich hendaalstörten kunnen un kaputt gungen. Ik bruuk de Stenen doch noch för mien Höhnerhuck. So is dat nu passeert, dat mi de Stenen an`t Tau na boven trucken. Daarbi hett de Kist mi de linke Schuller upreten as wi uns in de Mitt tomötkemen. Sonst bün ik an de Kist good vörbikomen. Hebb mi aver boven ganz düchtig mien Kopp stött, toeerst an de lüttje Balk un denn an de grode Balk. 

Doch ik hebb dat Tau fasthollen, ik wull doch nich rünnerfallen. In de sülvig Ogenblick is aver de Kist mit de Stenen ünnen up de Bodden hevig upstött. Dör dissen  Upprall is de Bodden rutbroken. Un so kunn dat passeren, dat de Kist lichter wordt as ik. De Folg daarvan weer, dat ik as de schworst Deel an de Tau wedder nach ünnen susen dee un de buterst Kant van de Kist na boven, waarbi wi uns wedder in de Mitt drepen. Daarbi reet mi de Rest van de Kist mien rechte Schuller up.

As de Kist denn boven weer, full ik so unglückerk up de Bodden, dat ik mi dat rechter Been broken hebb un tomaal ohn Besinnung weer. Bloot daardör kunn dat passeren, dat ik dat Tau losleet. Dat hett denn bewirkt, dat de Kist, nu aver ohn Bodden, as een riep Beern up mi daal full un mi so unglückerk dreep, dat ik daarnahst boven un ünnen een neei Gebitt hebben moot. 

Ik bedank mi bi hör Versekerungsvertreder, dat de Schaa nich noch grötter wurden is. Ik muss bi hüm eene Unfallversekerung ünnerschrieven. To Weerwinnen van mien Gesundheit un för mien neei Gebitt kriegst Se van mi de Reken. Ik gah daarvan ut, dat Se de Reken erkennen doot. Wenn ik mien Geld van hör kriegen do, denn will ik Se wieder anraden. Ik weet, dat mien Nahber ok een Höhnerhuck boen will.   

Mit Gröten

Hinnerk Gösen

in`t Platt översett van Johannes Peters

25.04.2008